June | 2020 | ԱՌՆԱՊ

Նոր տիպի կորոնավիրուսային համավարակով պայմանավորված սոցիալ-տնտեսական իրավիճակի գնահատումը ներկայումս առավել քան կարևոր խնդիր է, որի կարևորությունը հաշվի առնելով ՄԱԿ-ի զարգացման ծրագիրը (ՄԱԶԾ)` ՄԱԿ-ի մշտական համակարգողի կողմից ղեկավարվող ՔՈՎԻԴ-19-ի արձագանքման աշխատանքների շրջանակում, առաջնորդում է սոցիալ-տնտեսական և վաղ վերականգնման ոլորտները, և իրականացնում ՔՈՎԻԴ-19-ի սոցիալ-տնտեսական ազդեցության գնահատում համայնքային մակարդակում Հայաստանի ողջ տարածքով` համագործակցելով ՀՀ Կառավարության հետ: Գնահատման գործընթացը սկսվել է ս․թ․ մայիսի 5-ին և իրականացվում է երկու փուլով։ Առաջին փուլում` պիլոտային սկզբունքով, տնտեսվարողների և տնային տնտեսությունների գնահատման հարցաշարերն օգտագործվել են Վաղարշապատ և Բերդ համայնքներում, որոնք լրամշակվել են` հաշվի առնելով հարցումների ընթացքում առաջացած խնդիրները։ Երկրորդ փուլում հարցումներն իրականացվում են Երևանում և Հայաստանի բոլոր մարզերում՝ օգտագործելով համայնքային ներկայացուցչական ներգրավվածության ձևաչափը։ Ուսումնասիրության ամբողջ գործընթացը համակարգվում է ՄԱԶԾ-ի կողմից` սերտորեն համագործակցելով UNFPA, UNAIDS, UN Women գործակալությունների և ՀՀ տարածքային կառավարման և ենթակառուցվածքների նախարարության հետ, որի շրջանակներում հարցումներ իրականացնելու, հավաքագրված տվյալների վերլուծությամբ՝ բիզնես սեկտորի և ֆերմերային տնտեսությունների մասով պատասխանատու է «Ի ՎԻ Քոնսալտինգ» ՍՊԸ-ն, իսկ տնային տնտեսությունների մասով` «Դեյթամոտուս» ՍՊԸ-ն, ում կողմից ուսումնասիրվում են նաև մի շարք խոցելի խմբերի կարիքներ (բազմազավակ ընտանիքներ, հաշմանդամություն ունեցող անձիք, նպաստառուներ, միայնակ ծերեր, փախստականներ)։

Հարցումների արդյունքում հավաքագրված տվյալների վերլուծության բացահայտումների հիման վրա Երևանի և բոլոր մարզերի համար կձևավորվեն վաղ վերականգնմանն ուղղված առաջարկությունների փաթեթներ և ճանապարհային քարտեզներ, որոնք ակնկալվում է, որ օգտակար ներդրում կլինեն ՀՀ կառավարության, Երևան քաղաքի և այլ համայնքների համար՝ Քովիդ-19 համաճարակից վերականգնման պլանավորման գործում։ Վերջապես, այն կաջակցի` չեզոքացնելու նոր կորոնավիրուսային համավարակի ազդեցությունը միջնաժամկետ և երկարաժամկետ ապագայում, ինչպես նաև ի հայտ եկող կարիքների լուծմանը՝ շեշտը դնելով Հայաստանի առավել տուժած և խոցելի խմբերի, ինչպես նաև գործարարության վրա։

ԱՌՆԱՊ հիմնադրամը՝ որպես ՄԱԶԾ գործընկեր, ներգրավվել է ուսումնասիրության կազմակերպման գործընթացում՝ աջակցելով ՄԱԶԾ-ին և սոցիոլոգիական ընկերություններին, անհրաժեշտ տվյալների հավաքագրման և հարցումներն իրականացնելու հարցերում:
Անհրաժեշտ տվյալների հավաքագրման հարցում ՄԱԶԾ-ին աջակցել են նաև մարզպետարանները, ընտրված համայնքները, Ներդրումների աջակցման կենտրոնը, Գյումրու և Վանաձորի տեխնոլոգիական կենտրոնները, Ձեռնարկությունների ինկուբատոր հիմնադրամը և ոլորտային ասոցիացիաները:
Հարցումներ իրականացնելու տեսանկյունից բավականին արդյունավետ ներդրում է ունեցել Երևանի քաղաքապետարանի Սոցիալական ապահովության վարչությունը՝ քաղաքապետարանի և վարչական շրջանների սոցիալական աշխատակիցների ներգրավմամբ, ինչպես նաև գործընթացին աջակցել են կամավորներ՝ Ճգնաժամային կառավարման պետական ակադեմիայից, Ստեփանավանի «Լոռէ փրկարար ջոկատ» ՀԿ-ից, Հայ-սլավոնական համալսարանից, Բերդի «Կանանց ռեսուրս կենտրոն» ՀԿ-ից, ինչպես նաև կամավորական հիմունքներով աջակցել ցանկացող, ուսումնասիրության մեջ ներգրավված համայնքների ներկայացուցիչներ (Չարենցավան, Տաշիր, Եղեգնաձոր և այլն)՝ ընդհանուր թվով մոտ 70 կամավոր: ... Կարդալ ավելին

Ս.թ մայիսի 27-ի տեղի ունեցավ հանդիպում-քննարկում Բերդ համայնքի թվով 7 դպրոցի ներկայացուցիչների հետ, որի հիմնական նպատակն էր լսել դպրոցների ներկայացուցիչներին դպրոցների կողմից՝ 2019-2020թթ. ուսումնական տարվա ընթացքում, աղետների ռիսկերի նվազեցման ուղղությամբ կատարած աշխատանքների մասին, ներկայացնել դպրոցներին դպրոցական ԱՌԿ պլանի կատարելագործման տեսանկյունից առաջարկություններ և խորհուրդներ, ինչպես նաև որպես դպրոցներին տրամադրվող աջակցություն ՅՈւՆԻՍԵՖ-ի և «Աղետների ռիսկի նվազեցման ազգային պլատֆորմ» հիմնադրամի կողմից գնված գույքի տրամադրման ընթացակարգը: ... Կարդալ ավելին