IMG_1647

Կապանում կստեղծվի նորարարական երիտասարդական կենտրոն

Դեկտեմբերի 18, 2017թ․ Կապան համայնքի ղեկավարի տեղակալ Արգամ Գրիգորյանը հյուրընկալեց ՄԱԿ-ի զարգացման ծրագրի (ՄԱԶԾ) , «ԱՌՆ ազգային պլատֆորմ» (ԱՌՆԱՊ) հիմնադրամի և Սյունիքի մարզային փրկարարական վարչության ներկայացուցիչներին:

Հանդիպման նպատակն էր ներկայացնել ՄԱԶԾ-ի և ԱՌՆԱՊ հիմնադրամի կողմից իրականացվող «Հայաստանի ԱՌՆ ազգային պլատֆորմի կարողությունների զարգացում» ծրագիրը, քննարկել և համաձայնեցնել ծրագրի այն ուղղությունները, որոնք նախատեսվում են իրականացնել Կապան քաղաքում, ինչպես նաև պլանավորել հետագա անելիքները։
IMG_1649

ՄԱԶԾ ԱՌՆ ծրագրերի համակարգող Արմեն Չիլինգարյանը փաստեց, որ նախորդ տարիներին համայնքի հետ ձևավորած հաջող համագործակցությունն է պատճառներից մեկը, որ այս նոր մեկնարկած ծրագրի թիրախ համայնքերից մեկը կրկին Կապանն է, որից հետո ամփոփ ներկայացվեց ծրագիրը։

Ավելի մանրամասն ներկայացվեց և քննարկվեց Կապանում «Համայնքային երիտասարդական կենտրոն» ստեղծելու բաղադրիչը։ Ծրագրի շրջանակներում նախատեսվում է ստեղծել նորարարական երիտասարդական կենտրոն, որտեղ երիտասարդները կկարողանան զբաղվել ռոբոտաշինությամբ, անօդաչու թռչող սարքերի միջոցով իրականացնել նկարահանումներ, նկարահանված ինֆորմացիան տեղափոխել համակարգիչ և կազմել GIS հենքի քարտեզներ, ինչպես նաև ստեղծել անօդաչու թռչող սարքերի պարզագույն մոդելներ և այլն։

Գաղափարը կյաքի կոչելու համար քննարկվեց նաև տեղի ընտրության հարցը։ Հանդիպումը ավարտվեց համայնքապետարանի կողմից նորարարական երիտասարդական կենտրոնի հիմնման համար առաջարկվող տարածքի ուսումնասիրությամբ։

Որոշվեց, որ ամանորից հետո կկազմակերպվի հանդիպում, որին ներկա կլինեն այն կառույցների ներկայացուցիչները, ովքեր ներդրում են ունենալու նորարարական կենտրոնի ստեղծման գործում։ Հանդիպման ժամանակ կհստակեցվի յուրաքանչյուր կառույցի դերն ու պարտականությունները երիտասարդական կենտրոնի ստեղծման շրջանակներում։

Նշենք նաև, որ վերոնշյալ ծրագիրը ֆինանսավորում է Եվրահանձնաժողովի մարդասիրական օգնության և բնակչության պաշտպանության հարցերով գլխավոր վարչությունը։

Հանդիպման ընթացքում քննարկվեցին նաև այլ հարցեր։