IMG_7225

Իրականացվեց առաջին օգնության հրահանգչային դասընթաց՝ նոր մշակված ԱՕ ազգային չափանիշներին համապատասխան

Ս.թ. ապրիլի 9-14-ը ՀՀ արտակարգ իրավիճակների նախարարության «Աղետների բժշկության կենտրոն» ՊՈԱԿ-ում տեղի ունեցավ «Առաջին օգնության» (ԱՕ) հրահանգչային դասընթաց: Այն իրականացվեց Եվրահանձնաժողովի մարդասիրական օգնության և բնակչության պաշտպանության հարցերով գլխավոր վարչության կողմից ֆինանսավորվող «Աղետներին նախապատրաստման ծրագրի» (ԴԻՊԵԿՈ V) հայաստանյան բաղադրիչի մաս հանդիսացող «Աղետների ռիսկի նվազեցման ազգային պլատֆորմի կարողությունների զարգացում» ծրագրի շրջանակներում, որը նպատակ ուներ զարգացնելու ԱՌՆԱՊ կարողությունները՝ ԱՕ կրտսեր մասնագետներ ունենալու տեսանկյունից: Վերջիններս հետագայում կդառնան ԱՌՆԱՊ-ի մասնագիտական կարողությունը, որոնց աջակցությամբ հիմնադրամը կկարողանա իր ներդրումն ունենալ ԱՕ ոլորտի գիտելիքի տարածման և ամրապնդման գործընթացներում:

Դասընթացը բաղկացած էր երկու փուլից: Ս.թ. ապրիլի 6-7-ը իրականացվեց դասընթացի առաջին փուլը, որը նպատակաուղղված էր Աղետների ռիսկի նվազեցման (ԱՌՆ) և արտակարգ իրավիճակներին (ԱԻ) արձագանքման կարողությունների զարգացմանը: Այս փուլում մասնակիցները ծանոթացան ՀՀ-ում առավել հաճախ հանդիպող ԱԻ-ներին և դրանց առաջացման դեպքում ԱՕ տեսանկյունից օգնություն ցուցաբերելու քայլերին, որին հաջորդեց երկրորդ փուլը՝ բուն հրահանգչային դաընթացը: Դասընթացին մասնակցում էին ներկայացուցիչներ ՀՀ ԱԻՆ Ճգնաժամային կառավարման պետական ակադեմիայից, Արմենիա Վայն Ընկերությունից, Իրական դպրոցից, Մոսկվայի Մ.Վ. Լոմոնոսովի անվան պետական համալսարանի մասնաճյուղին կից Ա.Հ. Երիցյանի անվան դպրոցից, Հայաստանի Գիտությունների ազգային ակադեմիայի օրգանական և դեղագործական քիմիայի գիտատեխնոլոգիական կենտրոն ՊՈԱԿ-ից և ԱՌՆԱՊ հիմնադրամից:

Ներկա էին թվով 22 մասնակից, որոնցից 11 -ը՝ տղամարդ, 11-ը` կին:
Այն իրականացվեց լրամշակված հրահանգչային դասընթացի ուսումնական փաթեթի հիման վրա, որի լրամշակման համար հիմք էր հանդիսացել վերջերս մշակված առաջին օգնության (ԱՕ) ցուցաբերման ազգային չափանիշները: Դրանց մշակման գործընթացին ներգրավվեցին ներկայացուցիչներ ՀՀ առողջապահության նախարարությունից, ՀՀ կրթության և գիտության նախարարությունից, Հայկական Կարմիր խաչի ընկերությունից, ՀՀ ԱԻՆ Ճգնաժամային կառավարման պետական ակադեմիայից, ՀՀ ԱԻՆ «Աղետների բժշկության կենտրոն» ՊՈԱԿ-ին, ՄԱԿ-ի մանկական հիմնադրամից, Երևանի քաղաքապետարանի «Շտապբուժօգնություն» ՓԲԸ-ից, ՀՀ ԿԳՆ Կրթության ազգային ինստիտուտից, Կարմիր Խաչի միջազգային կոմիտեից, ՀՀ ԱՆ Առողջապահության ազգային ինստիտուտից և «Սեյվ դը չիլդրեն»-ի հայաստանյան ներկայացուցչությունից, ինչպես նաև անկախ փորձագետներ:

Հրահանգիչները դասընթացի առաջին օրը մասնակիցներին ներկայացրեցին ԱՕ դասավանդման մեթոդները, մանեկենների տեսակները, նրանց օգտագործման, պահպանման և վարկազերծման սկզբունքները, դեպքերի նմանակման և գործնական պարապմունքների անցկացման քայլերը, այնուհետև՝ ԱՕ թեմաների ներկայացման ուրվագծերը: Մյուս օրերին մասնակիցները նախապատրաստեցին և ներկայացրեցին ԱՕ հետևյալ թեմաները՝
– անգիտակից տուժած,
– վիրակապական նյութեր և վիրակապում,
– այրունահոսություններ,
– այրվածքներ,
– սրտի աշխատանքի և շնչառության վերականգնում,
– շնչուղիների խցանում,
– վերջույթների վնասվածքներ, անշարժացում,
– հրատապ գործողությունների փուլեր,
– թունավորումներ,
– կրծքավանդակի, որովայնի վնասվածքներ,
– հանկարծահաս հիվանդագին վիճակներ:

Հրահանգիչները, յուրաքանչյուրի կողմից ներկայացված թեմաների վերաբերյալ, առաջ քաշեցին իրենց դիտարկումները՝ նշելով առավելություններն ու թերությունները:
Վերջում մասնակիցները հանձնեցին տեսական և գործնական քննություններ:
Քննությունները հաջող հանձնած մասնակիցները ավելի ուշ կստանան համապատասխան վկայագրեր: